تاه

تاه رمش عينى وسرح شاف قلبى لما انجرح

سهم الحبيب ما رحم صابنى ف وسط الفرح

قلبى الضعيف انشرخ صوتى سبقنى وصرخ

والشرخ ما يتلحم ف القلب لو ينشرخ

جوايا شىء  انكسر

دمعى ف عينى اتعصر شفت اللى شفته انا

وخلّى... مالهوش اثر

راح من عنيه البصر عمرى اللى باقى قصر

ضاع من اديا الهنا  وخلّى مالهوش اثر

غدر الحبيب يقسمك  جوه القبور يرسمك

ويزيد عذاب قسوته  لو كان فى يوم بلسمك

طول م انت فيك الرمق

حرف السان يلثمك

وبعد ما ينشفك  يرميك بقى للسمك

دنيا الطمع خلّته  يحلم تزيد ثروته

شاف غيره جه يمتلك

دنيا الغرورغرته

حلّق وحوش خدعته وبينسا فين اخرته

طمعان ف ارض وحيطه  غطت عنيه برنيطه

رشرش لسانه بفلفل

ودهن عليه بشطيطه

لقّح  دماغه  ف زيطه  وقفل شفايفه بخيطه

تايه  وناسى  السكه   ومخه  فيه  لخبيطه

اخد الامور كدا قفش  قال لما الملم عفش

خايف اكيد من بكره  كان قبلا مابيخافش

من بعد ما كان وحش   طلع البعيد كوم قش

لعب الشيطان ف الاصل

حط الاصاله ف نعش عايش وزى الفل

شاهد  عليه  الكل  يحرب عشان تسود

همه الشيطان يدخل   ولا كانش زيه حد

ولا عمره داق الذل

يبقى العمى صاب ال  مايشفش م المنخل

دعبس ف ايه يتلم    كان نفسى بقى يتلم

فرز اللى كان حواليه

فكر ف مين يتخم جايب لنفسه الهم

ولا كان زمان يهتم

ادى البشر والناس

ادى الاصيل ياعم

اخدت امس وأول امس

صداع في راسى وضربة شمس

ماشى ورا بنت حليوه واسمها لولو عليوه

وحسها اوطى من الهمس وجسمها ممنوع اللمس

فستان فرح جوه دولابه  قلبى انشرح وفتح بابه

رمشى انجرح والعين دابوا جمال ما حدش يوم جابوا

جمالها مش موجود اصلاً ما بين قارات الدنيا الخمس

تقول بنات الكون دابو ما عادش فيه غير هىَّ وبس

ونسيب ما قابله وبعد الاسم ونعدى برضه وصف الجسم

كات كلها على بعضيها جمال ما شفتش في مثاله

مش لاقى وصف يكفيِّها ولا مثل من امثاله

ولو تعوز وصف جمالها محتاجه اربع رجاله

علي يمينها يكون واقف تلاته شعرا وزجَّاله

وشمالها رابع ييجى لاقف يحكى الخلاصه في عجاله