عمال تقول

عمال تحلف انك صعب

وما تحط شىء ف دماغك بتنولوا

وكمان تحلف قلبى سهل وبيتحب وايدك طايله

وح تطولوا

راجع نفسك تانى وفوق

فكر حبه ولما تروق

رد عليا حبيبى وقول انا غلطان ف اللى بقولوا

فكرك انك عايق  رايق

مابتضايق زارع ارض العشاق حدايق

عايش دايق شهد غرامك  ماشى وسايق قطر دلالك

واحنا علينا نطاوع امرك  نقبل عذرك نرضى بهجرك

لما بتسهر نسهر زيك  لماتضلم  نمشى ف ضيك

لونتعلم نقرا ف كتبك لو نتألم نشفى بطبك

لونستسلم يبقى لحبك

راجع نفسك تانى وفوق  فكر حبه

ولما تروق رد عليا حبيبى وقول

انا غلطان ف اللى بقولوا

قلبى حنين ايوه صحيح كل ليالى هواه تفاريح

لما يحب بيملى الكون

بهجه وفرحه على ميت لون

بيعيش ف هدوء وينام ف سكون

وبتلقاه بالهنا مسكون

ولا يعرفش خضوع وخنوع وشجن ودموع

ولا يقبالشى يبات مخدوع

وحنينى اليك ده مش معناه انك تنساه

لو ضل وتاه وخدو التيار لبعيد وداه

راجع نفسك تانى وفوق

فكر حبه ولما تروق رد عليا حبيبى وقول

انا غلطان ف اللى بقولوا

"انت اللى بادى"

كله ضاع كل شىء كان حلو ضاع
وانت السبب

واللى باع مش هو قلبك اللى باع من غير سبب ؟

ياللى شمت الاعادى ياللى بعت سنين ودادى

جاى ليه؟      بعد ايه ؟     
م انت اللى بادى

بعد عمر الشوق م فات لما شمس الحب غابت

جاى بتبكى ع اللى فات  جاى بتصبغ شعره شابت

جاى بتحييى فى اللى مات  جاى تولع شمعه دابت

ماتحاولشى لا ياروحى 
بعد ماشفيت جروحى

تيجى وترجع لى دمعى تيجى وتجرح جروحى

ماتحاولشى  احسن امشى  
 وقول لقلبك يقتصر

دا زى ماقال البشر ماينصلحشى اللى انكسر

ياللى شمت الاعادى   ياللى بعت سنين ودادى

جاى ليه؟      بعد ايه ؟    
 م انت اللى بادى

فضلت انادى  وعشت ادادى

وعيونك انت ما استجابت

وطال سهادى  وادى القسوه ادى جابت لك م جابت

فين ياحبيبى انت غايب وجيت متأخر

والعمر فات من امتى  والشوق اليك اتبخر

لو تبوس حتى الايادى لجل بصه بطرف رمشى

مش حتجنى م السعادى غير دموع ع الخد تمشى

وماتحاولشى احسن امشى 
وقول لقلبك يقتصر

دا زى ماقال البشر ماينصلحشى اللى انكسر

ياللى شمت الاعادى ياللى بعت سنين ودادى

جاى ليه؟    بعد ايه ؟      
 م انت اللى بادى

سقيت لقلبى كاس اساوتك خليته اقسى من الحجر

علمته يهوى الغدر زيك ولا كانش عمره يوم غدر

ياريته كان اخد العبر  م اللى انكوى واللى اتهجر

ماكنش داق طعم الالم ولاضاعش عمره معاك هدر

وجاى تقول الشوق رمانى وف بحورالهوى غرقان

لسه جاى تخدعنى تانى  م انكشف امرك وبان

ماتحاولشى تشوفنى تانى وافتكر مين اللى خان

لو حتفرش ارضى ورد  لو تخللى الشرد برد

مستحيل ارجع اليك او فى يوم اشتاق واجيك

ماتحاولشى  احسن امشى 
 وقول لقلبك يقتصر

دا زى ماقال البشر ماينصلحشى اللى انكسر

ياللى شمت الاعادى
 ياللى بعت سنين ودادى

جاى ليه؟    بعد ايه ؟     
 م انت اللى بادى