كل حاجة باقية فيا

كل حاجه باقيه فيا فات زمانها وعجّزت

الايدين اتخشبت

والساقين على عكازين اتعكزت

وضهرى مالايام قسم ما عدت عارف اترسم

وصعب جدا ابتسم العضم صابه الهشاشه

م الوش راحت البشاشه  مافضلشى منه الا شاشه

وهموم عليها اتمركزت

وكل حاجه باقيه فيا  فات زمانها  وعجزت

لا عدت شايف اقرا سطر ولا عدت سامع بعد متر

ولو حاولت الحق بقطر القى  الكعوب اتحجزت

كنت باكل احلى اكل وكل اكله بلون وشكل

دلوقتى كل حاجه لا والشهيه اتعززت

كنت بلبس احلى لبس كنت بتشطف بببس

لو مريش ولا جبس بس دارت مززت

وكل حاجه باقيه فيا

فات زمانها وعجزت

حتى وجبه كل شهر اللى دافع فيها مهر

لو حقول حيجينى قهر روحى منها اجزت

اتعدمتى ليه ياصحه حبه عطس وحبه كحه

نادره يا عافيه وشحه والشيبه جت وتحفزت

الجلد كان مفرود وكرمش والسنان ماتطيق مقرمش

والعيون بدات تبربش ان جاها ضى  اتنرفزت

وكل حاجه باقيه فيا فا ت زمانها

وعجزت

بقول الاه  والفين اه ولا بيكفوش

لان هواه  مخللى جروحى مايخفوش

بكيت غدره  بكيت هجره  بكيت ظلمه

وجلد الخد من دمعى خلاص حيبوش

اقول الصبر ياهل اللا اقول الصبر ياهل اللا

اقول الصبر ياهل اللا

ثلاثه صبر مايردوش !!!

وعهد الله مابتدومشى

يادوبك واقعه ماتقومشى

تلاقى الايد ماهش ايدك  ولا رجلك بقت تمشى

يافاكر انك الخالد  وان الدنيا دايمالك

فين الوالد وابو الوالد  ما دايم الا اعمالك

ماراح تنفع قصورعندك   ولا تشفعشى اموالك

وفين ستك وفين سيدك  دافنهم انت وبايدك

سايبهم وانت مش قادر سابوك وانت فى يوم عيدك

وقبليهم سبق ياما  وبعديهم لحق ياما

فقدت صحابى وحبايبى على بسيونى واسامه

وفرقتهم كانت قاسيه  كانت صعبه وقسامه

كانم عزوه كانم صحبه  كانم واجهه  كانم هامه

يادوب واقعه وبعد الواقعه  ماتقومشى

لاتلقى الايد بقت ايدك ولارجلك بقت تمشى

ساعه ماتدق اجراسك  تروح ساقط قوام ع الارض

يلف الكون داخل راسك ماتعرف طول ماتعرف عرض

يضبع امنك وحراسك  ولاتلقى  فاضلك فرد

وتلقى تراب وطين عاصك وتحضن فيك وساخه الارض

عشان هى مابتدومشى  وعهد الله

مابتدومشى

بطلت اضحى عشان مخلوق

بطلت انام الليل مفلوق قلقان على ده اودى اودول

ولا حد بيبقى عليا قلوق

انا عمرى ما حرجع تانى خجول

ولا عودت اعيش بادب ولا ذوق

ولاحايل حد ولا اترجاه ولا يوم على حد حكون مدلوق

ولا راح انقى كلام مترقى ح قول الكلمه مادام محزوق

راح اعلم قلبى يبقى جحود

وحقول لضميرى خلاص مرفود

وحخالف وامشى بعكس الناس

ون قالوا البيض راحقول السود

وحعيش من غير احساس وشعور

وراح ابنى ما بينهم اعلى سدود

وراح ارمى النيه الحلوه بعيد

واستنى عليها ياكلها الدود

ولا حرجع تانى واعمل خير م انا بعمل خير الاقيه ما يعود

فكيت فى خيوط حليت فى عقد ومناهم خيطى يعيش معقود

الناس كلها مليانه شرور دا يااما حسود ويا اما حقود

الود خلاص والرحمه خلاص

والحب ما بنا ما عاد له وجود

 

صعبان على نفسى انى اشوف نفسى 

تايه  مع اللى تاه

صعبان على حالى انى اشوف ياسى 

 ونا بتقتل  ويـاه

صعبان على عينى تلقانى رغم الحال 

بغزل خيوط  ماساه

لكن بعون الله راح ييجى يوم وانول

كل اللى  بتمناه

وح رجّع اللى فات واعدى ع النكبات 

واللى حصل  حنساه

وشى بيضحك اه لكن فى قلبى الاه ساكنه 

وليها  بيوت

باب الامل مقفول جوايا ميت مقتول 

عايشين فى حاله موت

ومركبى بتوه بعد الشراع ماطووه 

ماشيه فى بطن الحوت

لكن بعون الله راح ييجى يوم وانول

كل اللى  بتمناه

وح رجّع اللى فات واعدى ع النكبات 

واللى حصل حنساه

ارضى وعايزه عزيق وفى سكتى خوازيق 

بمشى عليها وافوت

قطرى وماله قضيب ماشى بقدر ونصيب

 فى محطتى ما يفوت

وناسى مش داريين وكلهم هاربين ولابيساووش سحتوت

لكن بعون الله راح ييجى يوم وانول

كل اللى  بتمناه

وح رجّع اللى فات واعدى ع النكبات ساعدنى ياالله

لسانى صاحب الصوت من بعدما كان صوت

بيقول دهب وياقوت

اصبح كما المخروس غالى الثمن مبخوس

وبقول عليه هلفوت

مـا عادش تانى يثور طلع له فوقه صخور

وتحت منه سكوت

لكن بعون الله راح ييجى يوم وانول

كل اللى بتمناه

وح رجع اللى فات واعدى ع النكبات

ساعدنى ياالله